कोरोना मृत्यूदर नियंत्रणात ठेवण्यात डॉक्टरांचे योगदान अद्भुत – राज्यपाल भगत सिंह कोश्यारी

 

BY - युवा महाराष्ट्र लाइव – मुंबई

जगात कोरोनाचे थैमान सुरु असताना भारतात कदाचित सर्वाधिक मृत्यूदर राहील अशी परिस्थिती होती. परंतु पीपीई किट परिधान करून डॉक्टर्स, निवासी डॉक्टर तसेच नर्सेस, पोलीस, स्वच्छता कर्मी यांसह सर्व कोरोना योद्ध्यांनी समर्पण भावनेने अद्भुत काम केल्यामुळेच देशातील मृत्युदर नियंत्रणात राहिला असे प्रतिपादन राज्यपाल भगत सिंह कोश्यारी यांनी आज येथे केले.राज्यपाल कोश्यारींच्या पुढाकाराने राजभवन येथे आयोजित ‘कृतज्ञता’ सोहळ्यात विविध क्षेत्रातील नामवंत डॉक्टरांचा बुधवारी (दि. १३) राज्यपालांच्या हस्ते प्रशस्तिपत्र देऊन सत्कार करण्यात आला, त्यावेळी ते बोलत होते.कोरोना काळात सर्वत्र परीक्षा नको असा सूर असताना आपण परीक्षा घेण्याबाबत आग्रही राहिलो आणि वैद्यकीय परीक्षांसह सर्व परीक्षा घेतल्या गेल्या. त्यामुळे विद्यार्थ्यांचे नुकसान झाले नाही व अधिक डॉक्टर्स उपलब्ध झाले असे राज्यपालांनी सांगितले.आजही जगातील कोरोना केसेसची आकडेवारी चिंताजनक असल्याचे सांगून नागरिकांनी कोविड प्रतिबंधक आचरण पाळण्याबाबत डॉक्टरांनी जनजागृती करावी अशी सूचना राज्यपालांनी यावेळी केली.जागतिक आकडेवारीनुसार आजही जगात १.७० कोटी एक्टिव्ह कोरोना केसेस असून दररोज ४ लाख केसेस निघत आहेत. त्यामुळे कोरोना विरोधातील पवित्रा कायम ठेवावा लागेल असा इशारा नेत्रशल्यचिकित्सक डॉ. केकी मेहता यांनी यावेळी दिला.